संकटमोचन हनुमानाष्टक (Sankat Mochan Hanuman Ashtak)

बाल समय रबि भक्षि लियो तब, तीनहुं लोक भयो अँधियारो।

ताहि सो त्रास भयो जग को, यह संकट काहु सों जात न टारो॥

देवन आनि करी विनती तब, छाँड़ि दियो रबि कष्ट निवारो।

को नहिं जानत है जग में कपि, संकटमोचन नाम तिहारो॥ १ ॥

बालि की त्रास कपीस बसै गिरि, जात महाप्रभु पंथ निहारो।

चौंकि महामुनि साप दियो तब, चाहिय कौन बिचार बिचारो॥

कै द्विज रूप लिवाय मिले तहं, लछिमन संग सुग्रीव सँभारो।

को नहिं जानत है जग में कपि, संकटमोचन नाम तिहारो॥ २ ॥

अंगद के संग लेन गए सिय, खोज कपीस यह बैन उचारो।

जीवत ना बचिहौ हम सो जु, बिना सुधि लाये इहां पगु धारो॥

हेरि थके तट सिन्धु सबे तब, लाय सिया-सुधि प्रान उबारो।

को नहिं जानत है जग में कपि, संकटमोचन नाम तिहारो॥ ३ ॥

रावन त्रास दई सिय को सब, राक्षसि सो कहि सोक निवारो।

ताहि समय प्रभु आनि दियो, तृन मूरति सों रिपु-मान पहारो॥

बानर रूप कियो तब सिय, मुद्रिका डारि दई जनु तारों।

को नहिं जानत है जग में कपि, संकटमोचन नाम तिहारो॥ ४ ॥

बान लग्यो उर लछिमन के तब, प्रान तजे सुत रावन मारो।

लै गृह बैद्य सुषेन समेत, तबै गिरि द्रोन सुबीर उपारो॥

आनि सजीवन हाथ दई तब, लछिमन के तुम प्रान उबारो।

को नहिं जानत है जग में कपि, संकटमोचन नाम तिहारो॥ ५ ॥

रावन जुद्ध अजान कियो तब, नाग कि फांस सबै सिर डारो।

श्री रघुनाथ समेत सबै दल, मोह भयो यह संकट भारो॥

आनि खगेस तबै हनुमान, जु बन्धन काटि सुत्रास निवारो।

को नहिं जानत है जग में कपि, संकटमोचन नाम तिहारो॥ ६ ॥

बन्धु समेत जबै अहिरावन, लै रघुनाथ पतार सिधारो।

देबिहिं पूजि भली विधि सों बलि, देउ सबै मिलि मन्त्र विचारो॥

जाय सहाय भये तब ही, अहिरावन सैन्य समेत संहारो।

को नहिं जानत है जग में कपि, संकटमोचन नाम तिहारो॥ ७ ॥

काज किये बड़ देवन के तुम, बीर महाप्रभु देखि बिचारो।

कौने सो संकट मोर गरीब को, जो तुमसों नहिं जात है टारो॥

बेगि हरो हनुमान महाप्रभु, जो कछु संकट होय हमारो।

को नहिं जानत है जग में कपि, संकटमोचन नाम तिहारो॥ ८ ॥

लाल देह लाली लसे, अरु धरि लाल लंगूर।

वज्र देह दानव दलन, जय जय जय कपि सूर॥